सरकारी सञ्चारको नियति

नेपालमा पत्रकारिताको शिलान्यास सरकारी व्यवस्थापनबाट भएको हो । त्यसो त विश्व पत्रकारिताकै शिलान्यास पनि सरकारी व्यवस्थापनबाटै भएको तथ्यलाई रोमन सम्राट जुलियस सिजरको दरबारबाट प्रकाशित ‘एक्टा डिउनार्’ले पुष्टि गर्दछ । त्यसभन्दा अघि सर्वसाधारण जनतालाई महत्वपूर्ण विषयमा लिखित रूपमा आधिकारिक सूचना दिने परिपाटी भएको प्रमाण अहिलेसम्म भेटिएको छैन ।

नेपालमा सरकारी आमसञ्चार माध्यमका आफ्नै कथा–व्यथा छन् । नेपालको सरकारी आमसञ्चार माध्यम भन्नाले जन्मकालका हिसाबले जेठो गोरखापत्र,माहिलो रेडियो नेपाल, साहिँलो राष्ट्रिय समाचार समिति र कान्छो नेपाल टेलिभिजन हुन् । चलनचल्तीमा यिनलाई सरकारी सञ्चारमाध्यम भनिएता पनि यथार्थमा यी राज्य सञ्चालित सञ्चारमाध्यम ( स्टेट रन मिडिया) हुन् । तर बजेट विनियोजन र सञ्चालक समिति गठन जस्ता पक्षमा जुन सरकार सत्तामा हुन्छ उसकै हालिमुहाली हुने भएकोले सरकारी सञ्चार माध्यम भन्ने गरिएको छ ।