‘खुमेनी’देखि ‘खामेनी’सम्म !

झन्डै २ वर्षदेखि चलिरहेको रुस–युक्रेन युद्धले युरोप आक्रान्त थियो । डेढ महिनाअघि हाम्रै दुई छिमेकी भारत र पाकिस्तानबीचको द्वन्द्वले भयावह रूप लिन खोज्यो । भारत–पाकिस्तानबीचको तनाव अझै सकिएको छैन । थोरै समयका लागि स्थगित भएको भनिँदै छ । यसैबीच एसियाका दुई मुलुकहरू इजरायल र इरानबीचको लडाइँले विश्वभरि नै तरंग ल्याएको छ । त्यसो त इजरायलको गाजा क्षेत्रमा हमास, लेबनानमा हिजबुल्लाह र यमनमा हुथीविरुद्धको कारबाहीले मध्यपूर्व तनावग्रस्त नै थियो । उल्लिखित सबै संगठन इरानको प्रत्यक्ष वा परोक्ष समर्थन वा सहयोगमै सञ्चालित हुन् । अहिले इरान र इजरायल प्रत्यक्ष रूपमै युद्धमा होम्मिन पुगेका हुन् । यी दुई देशबीचको युद्ध सुरु भएको साता दिन बित्दा नबित्दै भयावह रूप लिन थालेको छ । बिस्तारै अरू मुलुकको संलग्नता बढ्दै जाने र अरू क्षेत्रमा व्याप्त तनावहरू पनि यसैसँग जेलिएर विश्व युद्धको रूप लिने त होइन भन्ने आशंकासमेत हुन थालेको छ । इरान र इजरायलबीचको यसपटकको द्वन्द्वको सुरुवात इजरायलले गरेको हो । तर, दुई देशबीचको तनाव दशकौं पुरानो हो र सानोतिनो झडप बेलाबेलामा हुँदै गरेको नै हो ।

इजरायल र इरानबीचको शत्रुतालाई बुझ्न इतिहासको अलि पुरानो कालखण्डमा फर्किनुपर्ने हुन्छ । परापूर्व कालदेखि नै इस्लाम र यहुदीबीच एकखाले द्वेष रहिआएको छ । इस्लामले सुरुदेखि नै यहुदीलाई ‘शतान’ (शैतान) मान्यो । त्यो किन र कसरी भन्नेतर्फ नजाऔं । सायद इस्लाम धर्मको स्थापना कालमा स्थापना क्षेत्रको ’round विद्यमान प्रमुख धर्ममध्येको एक यहुदी भएको हुँदा विद्रोहको प्रतीकस्वरूप त्यस्तो दुश्मनी हुन गएको हुनसक्छ । त्यसो त इस्लामले यहुदी मात्र होइन सबै गैरइस्लाम अर्थात् अल्लाहको सर्वोच्चता स्वीकार नगर्ने सबैलाई काफीर (विधर्मी) मान्छन् । उनीहरूका अनुसार काफीरको विनाश गर्नु धार्मिक कार्य हो । कट्टर इस्लाम अनुयायीहरू एक काफीरलाई नष्ट गर्नु भनेको जन्नतमा (स्वर्ग) ठाउँ पाउनु हो भन्ने ठान्छन् । काफीरमध्ये पनि यहुदीलाई चाहिँ उनीहरू सबैभन्दा खतरनाक दुश्मन ठान्छन् । वास्तवमा यहुदी वा अन्य काफीरको अस्तित्व समाप्त पार्नु कट्टर इस्लामले आफ्नो धर्म ठान्छन् । आजको विश्वमा हेर्ने हो भने सभ्य समाजले आतंकवाद भन्ने गरेको ९० प्रतिशत घटनाहरू इस्लामको यही कट्टरताको उपज हो भन्दा फरक नपर्ला ।