इरान सम्झौताको घोषणापछि ट्रम्पको मनाए जन्मदिन उत्सव

काठमाडौं । अमेरिकी राष्ट्रपति डोनाल्ड ट्रम्पले आफ्नो ८०औँ जन्मदिनका अवसरमा इरानसँग युद्ध अन्त्य गर्ने ऐतिहासिक शान्ति सम्झौताको घोषणा गरेका छन् ।

उक्त कूटनीतिक उपलब्धिको उत्सवसँगै उनले ह्वाइट हाउसको साउथ लनमा आयोजित विशेष यूएफसी (अल्टिमेट फाइटिङ च्याम्पियनसिप) कार्यक्रमको आनन्द पनि लिए ।

जन्मदिनको उत्सव सुरु हुनुभन्दा करिब दुई घण्टा अघि ट्रम्पले आफ्नो सामाजिक सञ्जाल प्लेटफर्म ट्रुथ सोसलमा लेख्दै भने, “इस्लामिक गणतन्त्र इरानसँगको सम्झौता अब पूरा भएको छ । यस सफलताका लागि सबैलाई बधाई दिन्छु ।”

सम्झौतासँगै ट्रम्पले रणनीतिक रूपमा महत्त्वपूर्ण होर्मुज जलमार्ग विश्वका व्यापारिक जहाजहरूका लागि पुनः खुला गर्ने र अमेरिकी नौसैनिक नाकाबन्दी हटाउने घोषणा गरेका छन् । उनले आफ्नो सन्देशमा लेखेका छन्, “विश्वका जहाजहरू, आफ्ना इन्जिनहरू सुरु गर । तेललाई फेरि प्रवाह हुन देऊ ।”

ट्रम्पका अनुसार अमेरिका–इरान शान्ति सम्झौतामा आगामी शुक्रबार औपचारिक हस्ताक्षर हुनेछ । उनले यसले मध्यपूर्वमा दीर्घकालीन स्थिरता र सुरक्षा स्थापना गर्न मद्दत गर्ने विश्वास व्यक्त गरेका छन् ।

यस वर्ष ट्रम्पको जन्मदिन अमेरिकी स्वतन्त्रताको २५०औँ वार्षिकोत्सवसँग पनि जोडिएको छ । यही अवसरलाई विशेष बनाउन ह्वाइट ह्वाइट हाउसको साउथ लनमा यूएफसीको विशेष कार्यक्रम आयोजना गरिएको थियो, जहाँ प्रसिद्ध अष्टकोणीय ‘अक्टागन’ पिँजडाभित्र सातवटा प्रतिस्पर्धा राखिएका थिए ।

‘यूएफसी फ्रिडम २५०’ नाम दिइएको उक्त कार्यक्रमको सुरुआत ब्राजिलका डिएगो लोपेज र अमेरिकी फाइटर स्टिभ गर्सियाबीचको प्रतिस्पर्धाबाट भएको थियो ।

ट्रम्पले एकातर्फ इरानसँगको शान्ति सम्झौताको घोषणा गरे भने अर्कोतर्फ विश्वकै चर्चित मिश्रित मार्शल आर्ट्स प्रतियोगिताको रोमाञ्चक वातावरणको आनन्द लिए । ह्वाइट हाउसको इतिहासमा यस प्रकारको कार्यक्रमलाई एक असामान्य उत्सवका रूपमा हेरिएको छ ।

#अमेरिका

#इरान

#डोनाल्ड ट्रम्प