१४ अर्ब २७ करोड लागतमा बन्दै छ सिमेन्ट उद्योग

सुर्खेत । कर्णाली मात्र यस्तो प्रदेश हो, जहाँ अहिलेसम्म कुनै ठुला तथा मझौला खालका उद्योग, कलकारखाना छैनन् । अथवा सम्भावनाको प्रदेश मानिए पनि यहाँ लगानीमैत्री वातावरण नभएको भन्दै लगानीकर्ता आउन नमानेको भनिन्छ । तर अहिले भने पश्चिम सुर्खेतमा ठुलो लगानीमा सिमेन्ट उद्योगको काम सुरु भएको छ ।

चौकुने गाउँपालिका—९, को सुनाकाँडा क्षेत्रमा सूर्यतारा सिमेन्ट उद्योगको स्थापना सुरु भएको हो । यहाँ उद्योग निर्माण गर्ने भनेर २०७९ मै तयारी थालिएको थियो । यद्यपि जग्गा खरिद प्रक्रियादेखि खानी क्षेत्रका जनताको मुआब्जा लगायतका प्रक्रियाले केही ढिलाइ भयो । विगत केही महिनादेखि भने उद्योगका लागि आवश्यक संरचना निर्माणको काम धमाधम भइरहेको हो ।