भूसंरक्षणमा बाँस

नेपालमा हरेक वर्ष साउन २५ गते राष्ट्रिय भूसंरक्षण दिवस मनाइन्छ। पहाडी भूभागमा बढ्दो भूक्षय, पहिरो, नदी कटान, जलाधारको क्षयीकरण तथा प्राकृतिक स्रोतको दिगो व्यवस्थापनप्रति राज्य र नागरिकको ध्यानाकर्षण गराउने उद्देश्यले यो दिवस मनाउने परम्परा स्थापित भएको हो।

मनसुन सुरु हुनासाथ पहिरोले सडक, नदीले उर्वर भूमि कटान र बाढीले बस्ती जोखिममा पार्छन्। वर्षैपिच्छे वर्षातको समयमा सडक अवरुद्ध हुने र नागरिकहरू घर छोडेर विस्थापित हुने दृष्टान्त हाम्रा सामु रहिआएका छन्। त्यसपछि राहत, पुनः निर्माण र सडक मर्मतमा राज्यले अर्बौं रुपैयाँ खर्च गर्नुपर्छ।