पर्यटनको आकर्षण बन्दै एक महिने गुँला पर्व, स्वयम्भूमा बढ्यो धार्मिक पर्यटकको चहलपहल

काठमाडौं । नेवार समुदायका बौद्ध धर्मावलम्बीले परम्परागत रूपमा मनाउँदै आएको एक महिने गुँला पर्व बिहीबारदेखि सुरु भएको छ। धार्मिक आस्था, मौलिक संगीत, जातीय संस्कृति र काठमाडौं उपत्यकाका ऐतिहासिक सम्पदालाई एकै ठाउँमा जोड्ने भएकाले गुँला पर्व पछिल्लो समय सांस्कृतिक पर्यटनको महत्वपूर्ण आकर्षणका रूपमा समेत स्थापित हुँदै गएको छ।

नेपाल संवत्अनुसार गुँलाथ्व पारुदेखि ञलाथ्व पारुसम्म मनाइने यो पर्वका क्रममा भक्तजनले परम्परागत बाजागाजासहित बौद्ध चैत्य तथा विभिन्न धार्मिक स्थलको परिक्रमा गर्ने गर्छन्। पर्व सुरु भएसँगै काठमाडौंको स्वयम्भू महाचैत्य क्षेत्रमा धार्मिक यात्रु तथा पर्यटकको चहलपहल बढेको छ।