मनसुनसँगै दोहोरिन्छ चट्याङको त्रास, पाँच वर्षमा कोशीमा ६६ जनाको मृत्यु

सुनसरी– गत असार १३ गते मध्यरात इलामको रोङ गाउँपालिका–६, सलकपुरमा मुसलधारे पानी परिरहेको थियो। ८८ वर्षीय कालुवीर मोक्तान काठको बेरा र टिनको छानो भएको दुईतले घरको बरन्डामा बसिरहेका थिए। राति करिब १ बजे आकाश थर्किने गरी चट्याङ पर्यो। त्यही चट्याङको चपेटामा परेर मोक्तानको घटनास्थलमै मृत्यु भयो।

त्यसको भोलिपल्ट असार १४ गते सङ्खुवासभाको मकालु गाउँपालिका–१, चिर्खाङमा पनि चट्याङले ३९ वर्षीया कुमारी राईको ज्यान लियो। ठूलो वर्षा र हावाहुरी चलिरहेका बेला घरको मिटर बक्स बन्द गर्ने क्रममा चट्याङ लागेर गम्भीर घाइते भएकी राईको उपचारका लागि प्राथमिक स्वास्थ्य केन्द्र नुमतर्फ लैजाँदै गर्दा बाटोमै मृत्यु भयो।