आधारभूत अस्पताल निर्माणपछि सञ्चालनमा समस्या

मोरङका १० वटा पालिकामा निर्माण सुरु गरिएको आधारभूत अस्पतालहरू निर्माण सम्पन्न हुँदै आए पनि सञ्चालनमा समस्या देखिएको छ। अस्पतालको भौतिक पूर्वाधार सम्पन्न भए पनि चिकित्सक, स्वास्थ्यकर्मी, उपकरणलगायतको व्यवस्थापन हुन नसक्दा अधिकांश अस्पताल सञ्चालनमा आउन सकेका छैनन्।

तत्कालीन प्रधानमन्त्री केपी शर्मा ओलीले २०७७ मंसिर १५ गते देशभरका स्थानीय तहमा एकैसाथ आधारभूत अस्पताल निर्माण अभियान सुरु गरेका थिए। संविधानले सुनिश्चित गरेको आधारभूत स्वास्थ्य सेवालाई स्थानीय तहसम्म विस्तार गर्ने उद्देश्यले सुरु गरिएको यो महत्त्वाकांक्षी कार्यक्रमअन्तर्गत मोरङका १० स्थानीय तहमा पनि १० र १५ शय्याका आधारभूत अस्पताल निर्माण योजना अघि बढाइएको थियो, तर शिलान्यास भएको पाँच वर्ष बितिसक्दा पनि मोरङका अधिकांश अस्पताल पूर्णरूपमा सञ्चालनमा आउन सकेका छैनन्। कतै भवन निर्माण नै अधुरो छ भने कतै भवन बनेर पनि जनशक्ति, उपकरण र सञ्चालन बजेट अभावका कारण अस्पतालले अपेक्षित सेवा दिन सकेका छैनन्।