सिस्नो बन्यो आम्दानीको स्रोत

३० असार, तेह्रथुम । कुनै समय गाउँघरका पाखापखेरा, वनजङ्गल र खेतबारीमा उम्रिने सिस्नोलाई पोल्ने झारका रूपमा मात्र हेरिन्थ्यो । घाँस काट्दा, दाउरा खोज्दा वा खेतीपाती गर्दा शरीरमा बिझ्ने भएकाले धेरैका लागि यो झन्झटको विषय थियो।

कतिपयले सिस्नोलाई गरिबीको प्रतीकका रूपमा समेत हेर्थे। तर, समय परिवर्तनसँगै सोच बदलिएको छ । अहिले त्यही सिस्नो तेह्रथुमको लालीगुराँस नगरपालिका–१ का स्थानीयका लागि आम्दानीको भरपर्दो स्रोत बनेको छ । संरक्षण, खेती, प्रशोधन र बजारीकरणसँग जोडिएपछि सिस्नोले गाउँको अर्थतन्त्रमा नयाँ सम्भावनाको ढोका खोलेको छ ।