पोखरीमा कसरी बेपत्ता भए १४ वर्षीय मन्जित?

विराटनगर। मोरङको जहदा गाउँपालिका १‚ बुधनगरका १४ वर्षीय मन्जित यादवले २३ असार (मंगलबार) राति हतार-हतार खाना खाए। उनले आमा रन्जुदेवीलाई भनेका थिए- ‘म एकैछिनमा आइहाल्छु नि!’

आमाका लागि त्यो शब्द सामान्य थियो। छोरा बाहिर निस्कनु र केहीबेरमा फर्किनु उनको दैनिकी नै थियो। तर, मन्जितले बोलेको त्यो ‘एकैछिन’ यतिबेला उनको परिवारका लागि प्रतीक्षाको घडी बनेको छ। घरबाट निस्किएका मन्जित बुधबार बिहानदेखि विराटनगर १८‚ भेडियारीस्थित पोखरीको धमिलो पानीमा बेपत्ता छन्। आमा रन्जुदेवी यतिबेला छोराको बाटो हेर्दाहेर्दै अस्पतालको शय्यामा अचेत छिन्।