सर्वोच्चको फैसलाः गैरबैंकिङ सम्पत्ति बैंक तथा वित्तीय संस्थाले सकार गरेर लिएपछि ऋणीले चाहँदैमा फिर्ता नहुने

काठमाडौं । सर्वोच्च अदालतले गैरबैंकिङ सम्पत्तिका रूपमा बैंक तथा वित्तीय संस्थाले कर्जा नतिरेपछि सकार गरिलिई उपभोग गरेको सम्पत्ति कर्जाधनीमा फिर्ता नहुने फैसला गरेको छ । वीरगन्जका सुरेशकुमार शुक्लाले नेपाल राष्ट्र बैंकलाई विपक्षी बनाएर दायर गरेको रिट निवेदनमाथि सुनुवाइ गर्दै नियमित ऋण नतिरेर अटेर गरेको अवस्थामा बैंकले त्यस्तो सम्पत्ति सकार गरेर लिन कुनै बाधा नहुने भनेको छ ।

सर्वोच्च अदालतका न्यायाधीश बालकृष्ण ढकाल र न्यायाधीश हरिप्रसाद फुयाँलको संयुक्त इजलासले गैरबैंकिङ सम्पत्तिको हकको विषय बैंकले सकार गरेर लिइसकेको जग्गा जुनसुकै बेला पनि धितो फिर्ता गर्छु भनेकै आधारमा बैंकले फिर्ता गर्न नमिल्ने ठहर गरेको छ । २०३९ सालमा सुरेशकुमारका बाबु शिवकुमार शुक्लाले नेपाल बैंकबाट लिएको ऋण नतिरेपछि बैंकले कर्जा धितो सुरक्षणस्वरूप राखेको वीरगन्जको श्रीपुरस्थित कित्ता नम्बर ८२ को ३ रोपनी १५ आना जग्गा सकार गरेर लिएको थियो ।