बजेट व्यवस्थापनमा ध्यान देऊ
rajdhanidaily.com · Tue Sep 21 23:27:12 GMT 2021
ओली सरकारले ल्याएको अध्यादेश बजेटलाई प्रतिस्थापन गर्न देउवा सरकारले प्रतिस्थापन विधेयक ल्याएर प्रतिनिधिसभामा प्रस्तुत गरी पारित गरेपछि बजेट होलिडेका कारण देशमा दैनिक काम धान्न कठिन भइरहेको थियो तर अब भने स्थिति सहज बन्दै गएको छ तर यसलाई छिटोभन्दा छिटो टुंगोमा पु¥याउनुपर्छ । प्रतिस्थापन विधेयक सोमबार प्रतिनिधिसभाबाट पारित भएपछि मंगलबार राष्ट्रिय सभामा पेस गरिएको छ । यो पारित हुन समय लाग्ने देखिएको छ । पहिलेको बजेट निष्क्रिय बनाइएको र नयाँ बजेट कार्यान्वयनमा आउन समय लाग्ने भएकाले बजेट होलिडेको समस्या उत्पन्न हुन गएको थियो । राष्ट्रिय सभामा पेस भएको प्रतिस्थापन बजेट त्यहाँबाट पारित भएपछि पुनः प्रतिनिधिसभामा आउने प्रावधान रहेको छ । प्रतिनिधिसभाका सभामुख हुँदै राष्ट्रपति कहाँ पुगेर प्रमाणीकरण भएपछि मात्र बजेट कार्यान्वयनमा आउनेछ । त्यसअवधिसम्म दैनिक कार्य सञ्चालनका लागि वर्तमान सरकारले संवैधानिक दायित्वबाहेकका अन्य क्षेत्रमा खर्च गर्न नपाउने प्रावधानले गर्दा दैनिक खर्चमा समस्या उत्पन्न भएको छ ।
बिरलै देखापर्ने बजेट होलिडे चलिरहेको समयमा राष्ट्र प्रमुखहरू, सरकारी सर्वोच्च निकायका प्रमुखहरू र संवैधानिक निकायका प्रमुखको सेवासुविधा भने चालू नै रहन्छ । यस अर्थमा राष्ट्रपति, उपराष्ट्रपति, प्रधानन्यायाधीश, सर्वोच्च अदालतका न्यायाधीश, न्यायपरिषद्का सदस्य तथा संवैधानिक निकायका प्रमुख र पदाधिकारीको पारिश्रमिक र सेवासुविधा रोकिँदैन । योसँगै राष्ट्रपतिको प्रत्यक्ष अधिकार क्षेत्रभित्र पर्ने प्रदेश प्रमुखको पारिश्रमिक र सेवासुविधा तथा तिनको मातहतमा रहेका कार्यालयको प्रशासनिक खर्च पनि रोकिँदैन । बजेट होलिडेका कारण रोकिएका ३१ भदौपछि भएका सबै खर्चले भने बजेट विधेयक पारित हुनेबित्तिकै वैधानिकता पाउनेछन् । अघिल्लो सरकारले चालू आर्थिक वर्षमा ल्याएको अध्यादेश बजेटमा व्यवस्था गरिएको चालू खर्चमा केही कटौती गरी पुँजीगत खर्च बढाउँदै वर्तमान सरकारले प्रतिस्थापन विधेयक ल्याएको हो । बजेट होलिडेका अवधिमा वा बजेट पास नभएको अवस्थामा पनि संघीय सञ्चित कोषमाथि व्ययभार हुने रकम सरकारले निरन्तर खर्च गर्न भने पाउने व्यवस्था रहेको छ ।
स्रोतमा पूरा पढ्नुहोस् (rajdhanidaily.com)