बाढीबाट ४०८ अर्ब रुपैयाँ बराबरको क्षति, पुनर्निर्माणका लागि ७२३ अर्ब बढी आवश्यक

काठमाडौँ। रसुवा–भोटेकोशी बाढीबाट कुल ४०८ अर्ब २९ करोड रुपैयाँ बराबरको क्षति तथा आर्थिक नोक्सान भएको सरकारी आँकलबाट देखिएको छ। बाढीपछिको द्रुत क्षति तथा आवश्यकता आँकलन (आरडीएनए) प्रतिवेदनअनुसार विपद्बाट भएको कुल प्रभावमध्ये रु. २७४ अर्ब ४८ करोड प्रत्यक्ष भौतिक क्षति र रु. १३३ अर्ब ८१ करोड आर्थिक नोक्सान भएको छ।

विपद्बाट भएको क्षतिको पुनर्निर्माण, पुनःस्थापना र आर्थिक पुनर्लाभका लागि कुल रु. ७२३ अर्ब ३२ करोड आवश्यक पर्ने अनुमान गरिएको छ, जुन कुल क्षति र नोक्सानको तुलनामा झन्डै पौने दुई गुणा बढी हो। प्रतिवेदनअनुसार बाढीबाट पाँच जिल्लाका १५ स्थानीय तह प्रत्यक्ष प्रभावित भएका छन् भने ७ हजार ५७० भवनमा क्षति पुग्दा ८ हजार ३१७ घरपरिवारका ३२ हजार ९६३ जना प्रभावित बनेका छन्।