थाइराइड क्यान्सरको जोखिम उपचारको अधिकार सुनिश्चित गर

नेपालमा पछिल्लो समय क्यान्सरका बिरामीहरूको संख्या निरन्तर बढिरहेको छ । पाठेघर, स्तन, फोक्सो, ठूलो आन्द्रा र मुखको क्यान्सरसँगै अहिले थाइराइड क्यान्सरका बिरामी पनि उल्लेखनीय रूपमा बढ्दै गएका छन् । विशेष गरी महिला र युवा उमेर समूहमा थाइराइड क्यान्सरको बढ्दो प्रवृत्तिले जनस्वास्थ्यमा नयाँ चुनौती खडा गरेको छ । यसलाई केवल एउटा रोगको रूपमा मात्र नभई राज्यको स्वास्थ्य नीति, उपचार प्रणाली र नागरिकको स्वास्थ्य अधिकारसँग जोडिएको गम्भीर विषयका रूपमा लिन आवश्यक छ । क्यान्सर भनेको शरीरका कोशिकाहरू अनियन्त्रित रूपमा वृद्धि भएर अन्य अंगमा फैलिने अवस्था हो

थाइराइड क्यान्सर घाँटीको अगाडिको भागमा रहेको थाइराइड ग्रन्थिका कोशिकाहरू असामान्यरूपमा बढ्दा हुने रोग हो । समयमै पहिचान र उपचार गर्न सकिएमा थाइराइड क्यान्सरका ९५ प्रतिशतभन्दा बढी बिरामी पूर्णरूपमा निको हुन सक्छन् । तर, उपचारमा ढिलाइ भयो भने यसले बिरामीको जीवन नै संकटमा पार्न सक्छ ।