बडेमान भवनको छैटौं तल्लामा कसरी लाग्यो आगो ?

इटहरी । इटहरी उपमहानगरपालिका–६ स्थित मुख्य चोकबाट पूर्वपट्टि लाग्नेबित्तिकै बडेमानको भवन देखिन्छ । सो बडेमान भवनमा बुधबार बिहान ९ बजेर ३५ मिनेटमा आगलागी भएको सूचना आयो । सूचना आउनेबित्तिकै इटहरी उपमहानगरको बारुण यन्त्र (दमकल) आगो निभाउन खटियो । लगत्तै इलाका प्रहरी कार्यालय इटहरीबाट पनि प्रहरीहरू आगो नियन्त्रणका लागि खटिएका थिए ।

सेन्टर प्लाजा नामक भवनमा लागेको आगो निभाउन पुगेको दमकलले तत्कालै आगलागी नियन्त्रणमा लिन सकेन । छैटौं तल्लामा रहेको होटल बरन्डामा आगो झनै दन्किन थालेपछि स्थानीय पालिकाका दमकलहरू बोलाइयो । सुरक्षाकर्मीहरू बाक्लो मात्रामा खटिन थाले । पूर्व–पश्चिम राजमार्गमा गुड्ने सवारीसाधन ‘बाइपास’ गरी राजमार्ग खाली गराइयो । तर, सुरक्षाकर्मीहरू भने रमिता हेर्ने मानिसको घेराबन्दीमा परे ।