के हुन सक्ला अबको राजनीतिक विकल्प ?

पहिलो संविधानसभाबाट संविधान बन्न सकिरहेको थिएन । पटक–पटक म्याद थप्दा पनि दलहरूबिचको खिचातानीले लामो त्याग र बलिदानबाट स्थापित भएको पहिलो संविधानसभा संविधान नबनाएर अन्त्य हुँदै थियो । प्रमुख दलहरू संविधानसभाबाट नयाँ संविधान निर्माण भन्दा पनि सत्ताको खेलमा व्याप्त थिए । दलहरूको मुख्य विषय संविधान नभएर सत्ता मात्रै थियो । जनतामा निराशा व्यापक बढ्दै थियो । त्यति ठुलो त्याग र बलिदानपछि बनेको सरकारको कामबाट जनता निराश थिए ।

यसैबिच ०६८ सालमा स्व. उज्ज्वल थापाको नेतृत्वमा एउटा अभियान अगाडि आयो । त्यसको मुख्य लक्ष्य युवालाई सार्वजनिक जीवन र राजनीतिमा सहभागी गराउने, सुशासन, पारदर्शिता र जवाफदेहिताको पक्षमा आवाज उठाउने, पुराना खराब राजनीतिक अभ्यासको विरोध गर्ने, योग्य, नैतिक र सेवामुखी नेतृत्व विकास गर्ने थियो । यिनै विषय उठाएर पहिलो पटक पुराना राजनीतिक दलको विकल्पमा नयाँ वैकल्पिक अभियान सुरु भएको थियो ।