‘नेपालको दुःखमा हाम्रो साथ छ’

काठमाडौं : विभिन्न राष्ट्रहरूले भूकम्प प्रभावित जिल्लाहरूमा राहत र उपचारमा सहयोगका लागि नेपालको साथमा रहेको विश्वास दिलाएका छन्। विभिन्न देशका राष्ट्रपति, प्रधानमन्त्री र नेपालस्थित राजदूतावासले भूकम्पमा ज्यान गुमाएकाहरूप्रति गहिरो दुःख व्यक्त गर्दै घाइतेको स्वास्थ्य लाभको कामना गरेका छन्।

भारतीय प्रधानमन्त्री नरेन्द्र मोदीले शनिबार बिहान सामाजिक सञ्जालमा भूकम्पबाट भएको क्षतिप्रति दुःख व्यक्त गर्दै यस दुःखद घडीमा भारत नेपाली जनताका साथमा उभिएको बताएका छन्। नेपालका प्रधानमन्त्री पुष्पकमल दाहालको ट्वीटर ह्यान्डललाई मेन्सन गर्दै ‘नेपालमा गएको भूकम्पबाट भएको जनधनको क्षतिप्रति गहिरो दुःख व्यक्त गर्छु। दुःखद घडीमा भारत नेपाली जनतासँगै उभिएको छ र सबै किमिसमको सहयोग गर्न तयार छ’, मोदीले लेखेका छन्।