पर्सा प्रहरीका विवादित कार्य : दोषीलाई संरक्षण र निर्दोषलाई अपराधीकरण

जिल्ला प्रहरी कार्यालय पर्साले नियम-कानुनभन्दा पनि आफ्नो स्वार्थ पूरा गर्ने नियत राखेर कार्य गरिरहेको पीडितले आरोप लगाएका छन्। घटनाका दोषीलाई संरक्षण गर्ने र समाजमा रहेका प्रतिष्ठित व्यक्तिहरूलाई बनावटी मुद्दामा प्रतिवादी बनाएर अपराधीकरण गर्दा त्रासको माहोल बनेको वीरगन्जका स्थानीयले गुनासो गरेका छन्।

दोषीलाई संरक्षण र निर्दोषलाई बनावटी मुद्दा खडा गरेर दुःख दिने कार्यमा पर्साका प्रहरी नायब उपरीक्षक चक्रबहादुर मल्लको भूमिका रहेको पीडितले बताएका छन्। मल्ल केही वर्षपहिला प्रहरी निरीक्षक हुँदा वीरगन्जको वडा प्रहरी कार्यालय श्रीपुरका इन्चार्ज भएर बसेका थिए। श्रीपुरमा बस्दा तस्कर, बिचौलिया, दलाल सबैसँग उनको राम्रो सम्बन्ध थियो। पुरानो सम्बन्धका आधारमा बिचौलिया र दलालले जिल्ला प्रहरी कार्यालय पर्साका मुद्दा शाखा हेर्ने जिम्मा पाएका मल्ललाई प्रयोग गरेर दोषीलाई संरक्षण र निर्दोषलाई बनावटी मुद्दामा फसाउने कार्य भएको आरोप छ।