स्टेयरिङमै लागुऔषध, ४ चालक पक्राउ

कपिलवस्तु । चाडपर्व नजिकिँदै जाँदा घर फर्किने र गन्तव्यतर्फ हतारिने यात्रुको संख्या बढ्न थालेको छ। राजमार्गमा सवारीसाधनको चाप बढेसँगै यात्रु सुरक्षाको चुनौती पनि थपिएको छ। यही बेला कपिलवस्तुमा गरिएको ट्राफिक चेकजाँचले चिन्ताजनक अवस्था उजागर गरेको छ । यात्रु बोकेर सडकमा गुडिरहेका केही चालक लागुऔषध सेवन गरेको अवस्थामा फेला परेका छन्।

बुद्धभूमि नगरपालिका–२ गोरुसिङ्गेमा गरिएको लागुऔषध सेवन (लापसे) परीक्षणका क्रममा ४ जना चालक पक्राउ परेका छन्। जिल्ला ट्राफिक प्रहरी कार्यालय कपिलवस्तुले दिउँसो १ बजेदेखि साँझ करिब ५ बजेसम्म सञ्चालन गरेको विशेष चेकजाँचमा शंका लागेका २३ चालकको युरिन एक्रो किटमार्फत परीक्षण गरिएको थियो। तीमध्ये ४ जनाको रिपोर्ट पोजेटिभ आएको प्रहरीले जनाएको छ।