पाटन उच्च अदालतसहित १० निकायलाई नेपाल बारको पत्र
nayapatrikadaily.com · Thu Nov 11 00:15:00 GMT 2021
देशभरका कानुन व्यवसायी न्यायालय सुधारको आन्दोलनमा रहेकाले दैनिक दुई घन्टा कामकारबाही रोकेर सहयोग गरिदिन नेपाल बार एसोसिएसनले उपत्यकाका तीन जिल्ला अदालतसहित दश निकायलाई पत्राचार गरेको छ । बारले काठमाडौं, ललितपुर, भक्तपुर र काभ्रे जिल्ला अदालत, पाटन उच्च अदालत, विशेष अदालत, श्रम अदालत, राजस्व न्यायाधिकरण, प्रशासकीय अदालत र ऋण असुली न्यायाधिकरणलाई बुधबार यस्तो आग्रहसहित पत्राचार गरेको हो । महासचिव लीलामणि पौडेलले त्यसको बोधार्थ चारवटै जिल्ला बार इकाइलाई पनि दिएका छन् ।
पत्रमा न्यायपालिकाभित्रका विकृति, विसंगति, बिचौलिया, भ्रष्टाचार हटाई जनआस्था बढाउने कार्यका लागि प्रधानन्यायाधीश चोलेन्द्रशमशेर जबराको राजीनामा माग्दै आन्दोलन जारी राखेको उल्लेख छ । तर, जबराले राजीनामाको मागलाई अटेर गरी आफ्नो मात्र होइन, समग्र न्यायपालिकाको आस्था र गरिमालाई धुलिसात पार्ने कार्य गरिरहेको र अझै पनि बिचौलियाको साँठगाँठमा पेसी तोक्ने, सुनुवाइ गर्ने, अनधिकृत स्रोत–साधनको दुरुपयोग गरी घुसपैठ गराएर मुठभेडतर्फ सरिक भएको पत्रमा उल्लेख छ ।
स्रोतमा पूरा पढ्नुहोस् (nayapatrikadaily.com)