दिनभर सञ्चारगृहमा प्रहरीको धरपकड, चौतर्फी विरोधपछि पक्राउ परेका सबै पत्रकार रिहा

समाचार कक्षबाटै पत्रकारहरूलाई नियन्त्रणमा लिने र हतोत्साहित बनाउने कार्यप्रति राजनीतिक दल, प्रेस काउन्सिल तथा विभिन्न सरोकारवाला निकायले कडा विरोध जनाएपछि र प्रधानमन्त्रीको प्रत्यक्ष निर्देशनपछि नियन्त्रणमा लिइएका सबै पत्रकारहरू शुक्रबार राति रिहा भएका छन् ।

प्रहरी टोलीले नयाँ बानेश्वरस्थित ‘नेपाल प्रेस’को समाचार कक्षबाट पत्रकार विश्वमणि सुवेदी, अनामनगरस्थित ‘मोटिभेट न्युज’का अध्यक्ष तथा प्रधान सम्पादक शोभराज बराल र ‘डीएनए खबर’का प्रधान सम्पादक धीरज बस्नेतलाई नियन्त्रणमा लिएको थियो। त्यसैगरी ‘नयाँ पत्रिका दैनिक’को पुतलीसडकस्थित कार्यालयमा पनि सादा पोसाकका प्रहरी टोली पुगेर वरिष्ठ संवाददाता नवराज मैनाली र सम्पादक खगेन्द्र पन्तलाई नियन्त्रणमा लिन भन्दै अढाइ घण्टाभन्दा बढी समय कार्यालयमै अडान लिएका थिए ।