बालसुधार गृहमा गाँजा र मोबाइल बरामद, सुरक्षा निगरानीमाथि प्रश्न

क्षमताभन्दा झन्डै पाँच गुणा बढी बालबिज्याइँकर्ता राखिएको विराटनगरस्थित बालसुधार गृहबाट गाँजा, मोबाइल र सुर्तीजन्य पदार्थ बरामद भएपछि त्यहाँको सुरक्षा व्यवस्था र निगरानीमाथि प्रश्न उठेको छ। सुरक्षाकर्मी परिचालन हुँदाहुँदै प्रतिबन्धित सामग्री सुधार गृहभित्र भेटिनुले ती सामग्री कसरी भित्र पुग्छन् भन्ने गम्भीर प्रश्न खडा गरेको छ।

विराटनगर महानगरपालिका–३ स्थित बालसुधार गृहमा सोमबार जिल्ला प्रहरी कार्यालय मोरङ र वडा प्रहरी कार्यालय विराटनगर (क) को संयुक्त टोलीले छापा मारेको थियो। करिब ४० जना प्रहरीको टोलीले तीन घण्टासम्म सञ्चालन गरेको खोजतलासका क्रममा गाँजाको सानो पोका, छ थान मोबाइल र सुर्तीजन्य पदार्थ फेला पारेको हो।