ममताको शव टुक्र्याएको नरेश भट्टको स्वीकारोक्ति, हत्या गरेको आरोप भने अस्वीकार

नेपाली मूलकी नर्स ममता काफ्ले भट्टको हत्या अभियोगमा मुद्दा खेपिरहेका उनका पति नरेश भट्टले अदालतमा श्रीमतीको शव टुक्र्याएको स्वीकार गरेका छन्। बिहीबार नोभेम्बर ५ मा अमेरिकाको भर्जिनियामा जारी मुद्दाको सुनुवाइमा बयान दिँदै उनले ममतालाई शयनकक्षको भुइँमा मृत अवस्थामा भेटेपछि शव टुक्र्याएर व्यवस्थापन गरेको बताएका हुन्।

भट्टले शव टुक्र्याएको स्वीकार गरे पनि आफूले ममताको हत्या नगरेको जिकिर गरेका छन्। श्रीमतीको मृत्युबारे उनले प्रस्तुत गरेको विवरण बचाउ पक्षको दाबी हो र मुद्दामा अदालतको अन्तिम फैसला आउन बाँकी छ।