नेपाली चेलीको अमेरिकामा कारुणीक अवसान: शवबिनै ह*त्या प्रमाणित

अमेरिकाको भर्जिनिया राज्यस्थित मनासस पार्कमा बस्दै आएकी नेपाली मूलकी नर्स ममता काफ्ले भट्टको हत्या प्रकरणमा उनका श्रीमान् नरेश भट्ट दोषी ठहर भएका छन्। जूरीले नरेशलाई प्रथम श्रेणीको हत्या, शव लुकाएको तथा शव अपमान गरेको अभियोगमा दोषी ठहर गरेको हो।

सन् २०२४ को जुलाईदेखि बेपत्ता ममता काफ्ले भट्टको शव हालसम्म फेला परेको छैन। तर, शव नभेटिए पनि डीएनए परीक्षण, डिजिटल प्रमाण, निगरानी क्यामेराका दृश्य, अभियुक्तको गतिविधि तथा अन्य परिस्थितिजन्य प्रमाणका आधारमा अमेरिकी अदालतले हत्या भएको निष्कर्षमा पुग्नु यस प्रकरणको सबैभन्दा महत्त्वपूर्ण पक्ष बनेको छ।