सशस्त्रद्वारा कटारीमा १३० किलो गाँजा बरामद

उदयपुरको पश्चिमी भेग कटारीबाट सशस्त्र प्रहरी बलले ठूलो मात्रामा गाँजा बरामद गरेको छ। सशस्त्र प्रहरी बल नेपाल, ५ नं. हेडक्वाटर त्रियुगामातहत रहेको कटारी बेस क्याम्पको टोलीले कटारी नगरपालिका-६ स्थित साँघुरीबाट गाँजा बरामद गरेको हो।

बरामद गाँजाको परिमाण १ सय ३० किलो रहेको जनाइएको छ । गाँजा अज्ञातस्थलबाट ल्याउँदै गरेको भन्ने विशेष सूचनाका आधारमा खटेको टोलीले खानतलासी लिँदा गाँजा फेला परेको हो । बुधबार राति गाँजा ल्याउँदै गरेको सुराकी पाएपछि खटेको टोलीले साँघुरीदेखि करिब ५ किलोमिटर दक्षिण चुरे जंगलमा गाँजा फेला परेको हो।