निर्वाचन आयोगबाट अशोक राई नेतृत्वको जसपाले पायो मान्यता

काठमाडौं । उपेन्द्र यादव नेतृत्वको जनता समाजवादी पार्टी नेपाल (जसपा)बाट विभाजन भएर अशोक राईको नेतृत्वमा गठन भएको जनता समाजवादी पार्टी (जसपा)लाई निर्वाचन आयोगले दल दर्ता गरी प्रमाणपत्र दिएको छ । राई नेतृत्वको जसपाले आइतबार दल विभाजन गरी नयाँ दल दर्ता गरेपछि सोमबार आयोगले निर्णय गर्दै दल दर्ता गरी प्रमाणपत्र दिएको हो ।

आयोगका सहायक प्रवक्ता रामदत्त पाण्डेले नयाँ दललाई दर्ता गर्ने निर्णय भएको जानकारी दिए । राईसहित प्रतिनिधिसभाका सात सांसदले दल दर्ताका लागि आइतबार आयोगमा निवेदन दिएका थिए । राजनीतिक दलसम्बन्धी ऐन, २०७३ अनुसार नै दलले मान्यता पाएको पाण्डेले बताएका छन् । राजनीतिक दलसम्बन्धी ऐनको दफा ३३ र नियमावलीको नियम ५ बमोजिम दल दर्ता गरी आयोगको दल दर्ता किताबमा अभिलेखीकरण गर्ने निर्णय भएको उनले जनाएका छन् ।