खोटाङमा बालिकासँग विवाह गर्ने र गराउने पक्राउ

खोटाङ । जिल्ला प्रहरी कार्यालय खोटाङले बालविवाह गर्ने २८ वर्षीय युवक र एक महिलालाई पक्राउ गरेको छ । दिक्तेल रुपाकोट मझुवागढी नगरपालिका–१२ जालपाका रमेश राईले १३ वर्षीया एक बालिकासँग विवाह गरेको अभियोगमा पक्राउ गरेको हो ।

जिल्ला प्रहरी कार्यालय खोटाङका प्रवक्ता प्रहरी निरीक्षक मोहन पोखरेलका अनुसार प्रहरीले युवकलाई पुस १२ गते र विवाह गराउन मध्यस्थता गर्ने बालिकाकी आफन्त कमला राईलाई पुस १३ गते पक्राउ गरेको हो । आफन्तकामा हिँडेकी बालिकालाई बाटोमै रोकेर ललाईफकाई विवाह गरिएको थियो । पुस ८ गते भएको विवाहपछि बालिकालाई भोलिपल्ट किराँत संस्कार अनुसार भित्र्याइएको जानकारी प्राप्त भएको प्रहरीले जनाएको छ ।