ललिता निवास जग्गा हिनामिना प्रकरण : २ सय ९० जनाविरुद्ध सरकारी लिखत किर्तेको कसुरमा अभियोगपत्र दायर

काठमाडौं । बालुवाटारस्थित ललिता निवासको सरकारी जग्गा हिनामिना गरेको प्रकरणमा आइतबार २ सय ९० जनाविरुद्ध सरकारी लिखत किर्तेको कसुरमा जिल्ला अदालतमा अभियोगपत्र दायर गरिएको छ ।

प्रहरीको केन्द्रीय अनुसन्धान ब्युरो (सीआईबी) ले दिएको रायसहितको प्रतिवेदन तीन दिनभित्रमा अध्ययन गरी सरकारी वकिलको कार्यालय काठमाडौंले सो मुद्दा दायर गरेको हो । सबै प्रतिवादीहरूबाट १८ अर्बको बिगो मागदाबी लिइएको छ । सरकारी वकिलको कार्यालयले सीआईबीले मुद्दा चलाउन नपर्ने राय दिएकालाई मुद्दा चलाएको छ भने मुद्दा चलाउनै पर्ने भनिएकालाई भने उन्मुक्ति दिइएको छ । यस प्रकरणका प्रमुख निर्णयकर्ताका रूपमा रहेका पूर्व प्रधानमन्त्री माधवकुमार नेपाल , डा. बावुराम भट्टराई र तत्कालीन मुख्य सचिव लीलामणि पौडेललाई भने पूर्ण रूपमा उन्मुक्ति दिइएको छ ।