अर्थतन्त्रका सूचकका आधारमा हेर्दा के गर्‍यो सरकारले ?

माओवादी केन्द्रका अध्यक्ष पुष्पकमल दाहाल ‘प्रचण्ड’ नेतृत्वको सरकारले एक वर्ष पार गरिसकेको छ । सरकारको एक वर्षको सफलता तथा उपलब्धि के कस्तो रह्यो भन्ने सन्दर्भमा एक खालको विमर्श भइसकेको छ । धेरैले सरकारलाई पास मार्क दिए त कतिले यसपटक केही गर्ने प्रयास भने गरेको बताएका छन् । प्रमुख प्रतिपक्षी राजनीतिक दल लगायत केहीले केही पनि गरेन भन्ने टिप्पणी गरिरहेका छन् । आखिर सरकारले एक वर्ष पार गर्दा गर्‍यो के ?

प्रचण्ड नेतृत्वको गठबन्धन सरकारले कार्य प्रारम्भ गर्दा अर्थतन्त्रका परिसूचक दबाबमै थिए । बैंकहरूमा तरलता योग्य रकमको अभाव थियो । उच्च ब्याजदर, विदेशी मुद्रा सञ्चितिमा दबाब, पुँजी बजारमा चरम गिरावट लगायत समस्या थिए, प्रचण्ड नेतृत्व सरकारले खासगरी वित्तीय तथा मौद्रिक औजार प्रयोग गरी व्यावहारिक प्रयासबाट अर्थतन्त्र लगभग लयमै फर्काएको छ ।