वर्दीको आवरणमा सशस्त्रका एआईजी गौतमले केसम्म गर्न गरेनन् ?

काठमाडौं । सशस्त्र प्रहरी बलको १२ नम्बर गणका तत्कालीन गणपति रविनराज कर्णजितले एक दिन आफ्नो क्षेत्रबाट हुन्डी कारोबारीबाट २ अर्ब रुपैयाँ बरामद गरे । यति ठुलो रकम बरामद भएपछि उनले तत्कालै आफ्नो ‘चेन’मा जाहेर गरे । उनले जाहेर गरेको ठाउँ थियो बर्दिबासस्थित सशस्त्र प्रहरी बलको नम्बर २ बाहिनीको कार्यालय । र, मधेस प्रदेशका आठवटा गण हेर्ने सो कार्यालयका बाहिनीपति थिए सशस्त्र प्रहरी नायव महानिरीक्षक (डीआईजी) चन्द्रप्रकाश गौतम ।

गणपति कर्णजीतको ‘लोभलाग्दो’ जाहेरीपछि उनले कर्णजीतलाई ती हुन्डी कारोबारीलाई जसरी पनि होल्ड गरिराख्न निर्देशन दिए । र, नम्बर ९ गण महोत्तरीका तत्कालीन गणपति सुरेश सापकोटालाई तत्कालै सम्पर्क गरी गणको गाडी आवश्यक सुरक्षा व्यवस्थासहित बारा पठाउन निर्देशन दिए । योभन्दा बढी उनले गणपति सापकोटालाई केही भनेनन् ।