रोगी पशु किनबेच गर्ने जेल चलान

स्याङ्जा । फागुन १५ गते रेविज लक्षण देखिएका जनावर किनबेच गरेको आरोपमा पक्राउ परेका दुईजनालाई जिल्ला अदालत स्याङ्जाले पुर्पक्षका लागि जेल पठाइदिएको छ । वालिङ ५ का ५५ बर्षिय राजेन्द्र केसी र वालिङ ८ बस्ने शंसुदिन मियालाई जिल्ला अदालत स्याङ्जाले संक्रामक रोग फैलाउने कार्यमा संलग्न रहेको ठहर गर्दै पुर्पक्षका लागि जिल्ला कारागार स्याङ्जा पठाएको हो । रोगी पशु किनबेचमा ४ जना संलग्न भएपनि २ जना मात्रै पक्राउ परेका थिए भने दुईजना अझै फरार रहेका छन् ।

जिल्ला अदालत स्याङ्जाका न्यायधिस सरीता रायमाझीको इजलासले प्रतिवादीको थुनछेक बयानका आधारमा दुईजनालाई पुर्पक्षका लागि थुनामा पठाउने आदेश अनुसार जेल चलान गरिएको श्रेस्तेदार भुमिप्रसाद शर्माले जानकारी दिए । केसी र मिया चैत्र ११ गते जिल्ला कारागार पुर्पक्षका लागि जेल चलान भएको शर्माले बताए । उक्त कार्यमा संलग्न रहेका भीरकोट १ का नजबुन हसन मिया र भीरकोट २ का प्रेमबहादुर सार्की फरार रहेका छन् । सार्की सवारी चालक हुन भने मिया भैसी किन्ने व्यपारी रहेको बताइएको छ ।