कर–छलीमा उन्मुक्ति नहोस्

नेपालमा विद्युतीय सवारीसाधन (ईभी) को प्रयोग बढ्दै जाँदा यस क्षेत्रले हरित अर्थतन्त्र र ऊर्जा सुरक्षाको नयाँ सम्भावना बोकेको छ । तर, यही क्षेत्रसँग सम्बन्धित केही विवादास्पद घटनाले भने राज्यको राजस्व प्रशासन, भन्सार प्रणाली तथा नियामकीय संयन्त्रको विश्वसनीयतामाथि गम्भीर प्रश्न खडा गरेको छ । पछिल्ला वर्षहरूमा बीवाईडी ब्रान्डको आधिकारिक वितरक साइमेक्स इंक प्रालिसँग जोडिएका विभिन्न घटनाक्रमले सुशासन र कानुनी शासनको अवस्थाबारे बहसलाई थप तीव्र बनाएको छ ।

हाल चर्चामा रहेको विषय भनेको रसुवा भन्सार कार्यालयबाट गाडी भौतिकरूपमा नआइपुग्दै ठूलो संख्यामा विद्युतीय सवारीसाधनको जाँचपास गरिएको आरोप हो । यदि अनुसन्धानबाट यस्ता कार्यहरू पुष्टि भएमा यो केवल एउटा कम्पनी वा केही कर्मचारीको त्रुटि मात्र नभई सम्पूर्ण भन्सार प्रशासनको विश्वसनीयतामाथि गम्भीर चुनौती बन्न सक्छ । भन्सार ऐनले सामान्य अवस्थामा सामान भौतिकरूपमा उपस्थित भएपछि मात्रै जाँचपासको व्यवस्था गरेको अवस्थामा यस्ता घटनाले प्रणालीगत कमजोरी वा मिलेमतोको आशंका स्वाभाविकरूपमा जन्माउँछ ।