सुन तस्करी काण्ड : उच्चस्तरीय जाँचबुझ आयोग गठन

काठमाडौं । नेपाललाई मुख्य ट्रान्जिट बनाएर नेपालसहित विभिन्न मुलुकमा अवैध सुन कारोबार गर्ने तस्करहरूको छानबिन र कारबाहीका लागि सरकारले उच्चस्तरीय जाँचबुझ आयोग गठन गरेको छ । आइतबार बसेको मन्त्रिपरिषद्को बैठकले उच्च अदालतका पूर्व न्यायाधीश डिल्लीराज आचार्यको नेतृत्वमा आयोग गठन गर्ने निर्णय गरेको हो । आयोगलाई सुन तस्करीको छानबिन तथा जाँचबुझ गरी सुझावसहितको प्रतिवेदन पेस गर्ने कार्यादेश दिइएको सरकारका प्रवक्ता एवं सञ्चार तथा सूचना प्रविधिमन्त्री रेखा शर्माले बताउनुभयो ।

आचार्य नेतृत्वको समितिमा राजस्व अनुसन्धान विभागका पूर्व महानिर्देक किशोरजंग कार्की, पूर्व सहसचिव प्रेमराज जोशी र नेपाल प्रहरीका पूर्व अतिरिक्त महानिरीक्षक सहकुल थापा सदस्य रहेका छन् । गत साउन २ मा अन्तर्राष्ट्रिय विमानस्थल भन्सार कार्यालयबाट चेकजाँच गरी ६० किलो ७ सय १६ ग्राम सुन बाहिरिएपछि सुन तस्करीको मुद्दाले ठूलो हंगामा मचाएको हो । उक्त सुन तस्करी र त्यसअघि इलेक्ट्रिक चुरोट भेपमा लुकाएर ल्याएको सुनलाई लिएर सरकारसम्बद्ध दलका केही सांसदहरू र प्रमुख प्रतिपक्षी दलले उच्च स्तरीय जाँचबुझ आयोग गठनको माग गर्दै निरन्तर सदन अवरुद्ध गरेका थिए । त्यसबेला सरकार र प्रतिपक्षिसहित संसद्मा सहभागी राष्ट्रिय मान्यताप्राप्त दलहरूबीच झण्डै ६१ किलो सुन तस्करीबारे केन्द्रीय अनुसन्धान ब्युरो (सीआईबी)ले गरिरहेको अनुसन्धान सकिएलगत्तै असोज ५ मा आयोग बनाउने सहमति भएको थियो । यद्यपि, आयोगको कार्यादेशमा सहमति जुट्न सकेको थिएन ।