भैरहवामा २ करोड ५१ लाखको सुनका गहना बरामद, भारतबाट ल्याउँदै गरेकी महिला पक्राउ

रूपन्देही । भारतबाट नेपालतर्फ ल्याउँदै गरिएको २ करोड ५१ लाख रुपैयाँभन्दा बढी मूल्यको सुनका गहना भैरहवामा बरामद भएको छ। सशस्त्र प्रहरीले सिद्धार्थनगर नगरपालिका–१ शान्तिगेटस्थित जाँचकक्षबाट ती गहना बरामद गरेको हो।

सशस्त्र प्रहरी बल, नेपाल सीमा सुरक्षा गुल्म डण्डा रुपन्देहीबाट खटिएको टोलीले विशेष सूचनाका आधारमा काठमाडौं महानगरपालिका–१९ बस्ने ४६ वर्षीया इला पटेललाई जाँच गर्ने क्रममा गहना बरामद गरेको जनाएको छ। नेपाल प्रहरी र सशस्त्र प्रहरीको संयुक्त टोलीले भारतबाट नेपालतर्फ आउँदै गरेकी पटेललाई जाँच गरेको थियो।