गृह प्रशासन हल्लाइरहेको पूर्वप्रधानन्यायाधीश चोलेन्द्र शमशेर प्रकरण

काठमाडौं । पूर्वप्रधानन्यायाधीश चोलेन्द्रशमशेर जबरालाई सुरक्षा चुनौती रहेको भन्दै करिब १२ घण्टा प्रहरी नियन्त्रणमा राखिएको घटनाको परकम्प ललितपुरको नख्खु कारागारदेखि सशस्त्र प्रहरी बलको हेडक्वार्टरसम्म पुगेको छ । यसमा बिचौलिया इनाम सापकोटासमेत जोडिएपछि यसको तरंग अन्यत्रसमेत पुग्न सक्ने अनुसन्धान अधिकृतहरूले बताएका छन् ।

पूर्वप्रधानन्यायाधीश जबरासँग मिलेर आफ्नो पक्षमा फैसला गराउन चलखेल गरेको आरोपमा विवादास्पद व्यवसायी दीपक भट्टलाई नख्खु कारागारको थुनाबाट सिन्धुपाल्चोकमा स्थानान्तरण गरिएको छ । भट्ट छुटाउन पूर्वप्रधानन्यायाधीश जबरासमेतले चलखेल गरेको आरोप प्रधानमन्त्रीको सचिवालयका सदस्यहरूको रहेको प्रहरी अधिकृतहरूको भनाइ छ ।