चन्द्रकोट हत्या प्रकरणः मदरसाको अनुमति रद्द

गुल्मी । १५ वर्षीया बालिका मनीषा चुँदालीको हत्या प्रकरणपछि गुल्मीको चन्द्रकोट गाउँपालिका–४ शान्तिपुरस्थित मदरसा सधैका लागि बन्द गरिएको छ । मुस्लिम समुदायका नागरिकको आह्वानबमोजिम गाउँपालिकाले सोही समुदायकै नागरिकले नमाज पढ्ने ठाउँ मदरसाको अनुमति रद्द गरेको हो ।

चार वर्ष अगाडिदेखि सञ्चालनमा आएको मुस्लिमहरूको धार्मिक विद्यालय मदरसा गुल्सने मदिनामा पाका ठूला उमेरका नागरिकले सातामा एक दिन एवं साना बालबालिकाले दैनिक रूपमा बिहानमा नमाज पढ्ने गरेका थिए ।