चाडपर्वमा कर्णालीमा ५ हजार बढी प्रहरी परिचालन

आउँदै गरेको दसैँ, तिहार, नेपाल संवत् र छठलाई लक्षित गर्दै कर्णाली प्रदेश प्रहरीले विशेष सुरक्षा योजना लागू गरेको छ।

चाडपर्वका बेला हुन सक्ने आपराधिक तथा अवाञ्छित गतिविधि नियन्त्रण, सडक दुर्घटना न्यूनीकरण, यात्रुको सुरक्षित आवागमन तथा बजारमा हुने कालोबजारी र ठगी नियन्त्रणलाई प्राथमिकतामा राख्दै प्रदेशका १० वटै जिल्लामा सुरक्षा व्यवस्था कडा पारिएको हो।