भङ्गालमा ‘सुनको भण्डार’ खोतल्दा प्रहरीसँग झडप, भन्सार प्रणालीमाथि फेरि गम्भीर प्रश्न

काठमाडौं । बूढानीलकण्ठ नगरपालिका- २, भङ्गालस्थित एक घर सधैँ सुनसान हुन्थ्यो । पूर्वराष्ट्रपति विद्या भण्डारी जेन-जी आन्दोलनसम्म बसोबास गरेको घरनजिकैको उक्त घरमा चिनियाँ नागरिक बस्छन् भन्ने प्रायःलाई थाहा थियो । तर, त्यहाँ के हुन्थ्यो भन्ने कुरा बिहीबार दिउँसो प्रहरी र त्यहाँ बस्ने चिनियाँबीच धक्कामुक्का चलेपछि मात्रै खुल्यो ।

प्रहरीको काठमाडौं उपत्यका अपराध अनुसन्धान कार्यालयले उक्त घरमा छापा मार्ने क्रममा त्यहाँ ठोस र तरल सुनसहित प्रशोधन सामाग्री, कालिगढ, जोख्ने मेसिन र भण्डारण गर्ने ठाउँसम्म फेला पार्‍यो । प्रहरीस्रोतका अनुसार त्यति कुरा पत्ता लगाउन एक हप्ताभन्दा बढी समय मेहेनत गर्नुपरेको थियो । बिहीबार अपराध अनुसन्धान कार्यालयबाट खटिएका सादा पोशाकका प्रहरीलाई घरभित्र छिर्न नै मुस्किल परेको थियो । बल्लतल्ल प्रहरी कम्पाउण्डमा छिर्‍यो ।