साझा फूलबारीमा सबै जातजाति र धर्मका फूल फुल्नुपर्छ : प्रदेश प्रमुख खापुङ

उदयपुर । कोशी प्रदेश प्रमुख परशुराम खापुङले नेपाल विभिन्न जातजाति, भाषाभाषी, धर्म र संस्कृतिका समुदायको साझा फूलबारी भएको बताएका छ । उनले विविधता बीचको एकता नेपालको मौलिक पहिचान भएकाले सबै समुदाय बीच आपसी सद्भाव, धार्मिक सहिष्णुता र राष्ट्रिय एकता कायम गर्नु पर्नेमा जोड दिए ।

उदयपुरको त्रियुगा नगरपालिका–२, जोगिदहस्थित शिवालय मन्दिर धार्मिक वन समूहमा निर्मित शिवलिङ्गको सोमवार एक कार्यक्रमका बीच उदघाटन गर्दै प्रदेश प्रमुख खापुङले यस्तो बताएको हो । उनले नेपालमा विभिन्न जातजाति र भाषाभाषीको बसोबास रहेको तथा विभिन्न धर्म मान्ने समुदायहरू पनि मिलेर बसेको उल्लेख गर्दै सबै धर्म, संस्कृति र परम्पराको सम्मान गर्नु पर्ने बताए ।