पर्यटकीय सहरमा सार्वजनिक सवारीको ‘धुँवा आतंक’

पोखरा नगरभित्र संचालन हुने नगरबसले अधिक धुँवा फ्याकेको र प्रदूषण बढाएको गुनासो पर्याप्त आउँछ। यतिसम्मकी बसको पछिपछि दुईपांग्रे सवारीमा यात्रा गर्नुपरेको खण्डमा बाटो नै नदेखिने र निसासिने अवस्था समेत निम्तिने गरेको गुनासो पोखरेलीले गर्ने गरेका छन्। नगर बसले अधिक धुँवा फ्याकेको गुनासो आउन थालेपछि यातायात व्यावस्था कार्यालयले आकस्मिक रुपमै नगरभित्र गुड्ने सवारीको प्रदूषण मापन गर्न थालेको छ।

सवारीको प्रदूषण मापन गर्दा धेरै सवारीले अधिक प्रदूषण गरेको पुष्टि भएको यातायात व्यवस्था कार्यालय कास्कीको भनाई छ। कार्यालयका प्रमुख ढाकाप्रसाद शर्माका अनुसार आइतबार पोखरा सहरभित्र गुड्ने ४० वटा नगर बस परीक्षण गर्दा १५ वटा सवारीले बढी धुँवा उत्सर्जन गरेको पुष्टि भएको थियो। शर्माका अनुसार अहिले सन् १९९५ पछि बनेका डिजेलबाट चल्ने सवारीका लागि धुँवाको घनत्व ६५ तोकिएको छ।