‘राष्ट्रपतिको सवारीबाट सर्वसाधारणले दुःख नपाऊन्’

काठमाडौं । नेपाली कांग्रेसका उपसभापति धनराज गुरुङले राष्ट्रपतिको सवारीमा तामझामबाट नागरिकले दुःख पाउन नहुने बताउनुभएको छ । बुधबार राष्ट्रपति रामचन्द्र पौडेलसँग भेटवार्ता गर्दै उपसभापति गुरुङले राष्ट्रपतिको सवारीमा तामझाम गरेर सर्वसाधारणलाई दुःख दिने विगतको परम्परालाई तोड्न सुझाव दिनुभएको हो ।

शीतल निवास पुगेर राष्ट्रपति पौडेललाई बधाइ तथा शुभकामना दिएका उपसभापति गुरुङले सञ्चारकर्मीहरूसँग भन्नुभयो– ‘आजको भेटमा नवनिर्वाचित राष्ट्रपतिलाई शुभकामनासहित राष्ट्रपतिको सवारीमा तामझाम गरेर सर्वसाधारणलाई दुःख दिने विगतको परम्परालाई तोड्न सुझाव दिएको छु ।’ भेटमा राष्ट्रपति पौडेलले आफ्नो सवारीका नाममा जनतालाई दुःख दिने पक्षमा आफू नरहेको बताउनुभएको गुरुङले जानकारी दिनुभयो ।