अर्थहीन अर्को युद्धको धम्की र जनजन

यता केही समयदेखि राजनीति पुनः तरंगित हुन थालेको छ । देशको अवस्था डाँवाडोलमै रहेको पुष्ट्याइँ हुन थालेका छन् । नेताहरुका मलहमपट्टी लगाउने कछुवे गतिका विकास र तीव्र गतिका भाषणले जनजन वाक्क भैसकेका छन् । अब जतिसुकै तीव्र गतिका भाषणले पनि जनजनमा कुनै असर नपर्ने अवस्था देखिइसकेको छ । हो, यस्तै–यस्तै तरंगहरुबाट देश तरंगित भैरहेको बेला गएको हप्ता सर्वोच्च अदालतबाट एउटा महत्वपूर्ण आदेशले राजनीतिक अंशियारहरु विशेष गरेर माओवादीहरु तिल्मिलाएका छन् । सर्वोच्चको आदेशको सारचाहिँ द्वन्द्वकालीन मुद्दालाई जति बेलासम्म चाह्यो त्यति बेलासम्म तन्काइराख्न मिल्दैन भन्ने आशयको थियो । वास्तवमा आदेशबाट कोही पनि तर्सिहाल्नुपर्ने अवस्था त थिएन तर देशको दुर्भाग्य नै भन्नुपर्दछ सर्वोच्चको उक्त आदेशबाट माओवादी तर्सनसम्म तर्सिएको छ र जनजनलाई अर्को युद्ध हुन सक्नेसम्म भनेर धम्कीको भाषा बोल्न पुगेको छ ।

नेपाल कम्युनिस्ट पार्टी (माओवादी केन्द्र) ले वर्तमान प्रधानमन्त्री पुष्पकमल दाहाल ‘प्रचण्ड’ विरुद्धको मुद्दालाई दर्ता गरेर न्यायिक प्रक्रियामा ल्याउन आदेश दिएलगत्तै माओवादी धारहरु अब के हुने हो भनेर अत्तालिन पुगेका छन् । गएको हप्ताको आइतबार नै जनयुद्धका शहीद तथा बेपत्ता योद्धाको योगदान र नेतृत्वको दायित्व विषयक अन्तरक्रिया कार्यक्रममा प्रधानमन्त्रीदेखि तत्–तत् सम्बन्धी नेताहरु भेला भएर सर्वोच्चको उक्त आदेशलाई चुनौती दिने काम गरेका छन् ।