तोडफोडका घटनामा संलग्न भएको अभियोगमा काभ्रेमा थप एघार जना पक्राउ

काभ्रेपलान्चोक । गत भदौ तेस्रो साता भएको ‘जेनजी’ प्रदर्शनका क्रममा काभ्रेमा तोडफोड ,आगजनी तथा अन्य घटनामा संलग्न भएका अभियोगमा थप एघारलाई नेपाल प्रहरीले पक्राउ गरेको छ । उनीहरूलाई जिल्ला अदालत र जिल्ला प्रशासन कार्यालयबाट धरौटीमा रिहा भए लगत्तै पुनः पक्राउ गरेको हो ।

धरौटी बुझाए लगत्तै प्रहरीले सोही स्थानबाट पक्राउ गरी पुनः अभद्र व्यवहारमा मुद्दा दर्ता गरेको छ । जिल्ला अदालतबाट आठ जना र प्रशासन कार्यालयबाट तीन जनालाई धरौटीमा छाड्ने आदेश भएपछि उनीहरूलाई पुनः पक्राउ गरिएको जिल्ला प्रहरी कार्यालय धुलिखेलले जनाएको छ । पक्राउ परेका सबैलाई इलाका प्रहरी कार्यालय बनेपाले अभद्र व्यवहारमा शुक्रबार म्याद थप गरेको हो ।