ब्याटलग्राउण्ड मोरङ–५ : बोर्डरको चिया पसलमा पिच सडकबारे विवाद, किसानलाई मलको चिन्ता

विराटनगर । रंगेलीको धनापट्टी हुँदै मधुवनी निस्कने बाटो पिचैपिच छ । लहलह धानखेतको बीचमा बनेको पिच सडक सुन्दर पनि छ । बयलगाडा पनि पिच सडकमा हिँडिरहेका छन् । कुनैकुनै ठाउँमा किसानले धान तथा कृषिजन्य वस्तुको बिस्कुन पनि सडकमै लगाएका छन् ।

चुनावको माहोल तातेकै समय पारेर उक्त सडक हुँदै रातोपाटीको टोली नेपाल–भारत सीमा क्षेत्र रंगेली–५ को धनापट्टी पुग्यो । पारी भारतको लेटी गाउँ छ । त्यहाँबाट सर्वसाधारण नेपाल–भारत आवतजावत गर्दछन् । कतिपय अवैध चोरी, तस्करीका लागि यो ठाउँ सुरक्षित छ । सुरक्षाकर्मीको उपस्थिति दुवैतिर देखिएन । दशगजा क्षेत्रमा तस्बिर लिएर सीमानामै रहेको एउटा चिया पसलमा बसिरहेका स्थानीयसँग त्यही पिचबाटोको विषयमा कुराकानी सुरु गरियो ।