प्रचण्डको दौडधुप : कांग्रेस र जसपासँग गठबन्धनको प्रयास

२५ फागुन, काठमाडौं । साबिक नेकपाको प्रचण्ड–माधव समूहको ठूलो हिस्सा माधवकुमार नेपाल समूहलाई विदा गरेको भोलिपल्ट पुष्पकमल दाहाल प्रचण्डले माओवादी केन्द्रको स्थायी कमिटी बैठक राखेर नेपाली कांग्रेस र जनता समाजवादी पार्टी (जसपा)सँग वार्ता गर्ने निर्णय गराए ।

बैठक लगतै कांग्रेस सभापति शेरबहादुर देउवालाई भेट्न उनकै निवास बूढानीलकण्ठ पुगे । देउवासँग करिव २० मिनेट कुरा गरेका उनी टोखा पुगे र जसपा संघीय परिषद् अध्यक्ष डा. बाबुराम भट्टराईलाई भेटे । त्यो भेटमा जसपा अध्यक्ष उपेन्द्र यादव लगायतका नेताहरू समेत सहभागी थिए ।