नयाँ नियमावलीले सरकार–शैक्षिक परामर्श व्यवसायी आमनेसामने

भक्तपुर : हरेक वर्ष करिब १ लाखको संख्यामा नेपाली विद्यार्थी उच्च शिक्षाका लागि बिदेसिने गर्छन्। विद्यार्थीको वैदेशिक यात्रासँग अभिभावकको वर्षौंको बचत, भविष्यप्रतिको भरोसा र सुखी जीवनको सपना पनि जोडिएको हुन्छ। विद्यार्थी र अभिभावकको यही सपना पूरा गर्ने पुलका रूपमा पछिल्ला दुई दशकदेखि शैक्षिक परामर्श संस्था (कन्सल्टेन्सी) ले योगदान छ।

शैक्षिक परामर्श संस्था अर्थात् कन्सल्टेन्सीहरूले विद्यार्थीहरूलाई शैक्षिक परामर्श, विश्वविद्यालय छनोट, भिसा प्राप्ति, शुल्क भुक्तानी, विदेश प्रस्थान र अध्ययनमा सहजीकरण गर्दै आएका छन्। नेपाली विद्यार्थीको विदेशमा अध्ययनप्रतिको आकर्षण बढ्दै जाँदा कन्सल्टेन्सीहरूको संख्या पनि बढ्दै गएको छ भने आर्थिक कारोबारमा पनि वृद्धि देखिन्छ। नेपाल राष्ट्र बैंकको विवरणअनुसार पछिल्ला तीन आर्थिक वर्षमा त्यस्तो कारोबार एक खर्ब रुपैयाँभन्दा बढी रहेको छ।