बरु गोली ठोक, तर सत्य लेख्न छाड्दिनँ

काभ्रे । पत्रकारितामा क्रियाशील भएको दुई दशक नाघेको छ । नेपाल समाचारपत्र राष्ट्रिय दैनिकमा आबद्ध भएको एक दशक नाघेको छ । कामना प्रकाशन समूहका सहप्रकाशनहरु न्युज अफ नेपाल, कामना, साधनालगायतका सञ्चारमाध्यममा पनि नियमित आबद्धता कायम नै छ । मैले जानेको पत्रकारिताले मलाई निडरताका साथ सत्य लेख्न सिकाएको छ । सत्य लेख्दा कसैले कुनै धम्की दिन्छ भने म त्यसको परवाह गर्दिनँ किनकि सत्यलेखन मेरो धर्म हो । कोही अधर्र्मीको धम्कीले मलाई विचलित पार्ने छैन ।

पछिल्ला समय सुन तस्करी र नागरिकता बिक्रीका विरुद्ध निरन्तर समाचार लेख्दै आइरहेको छु । यसै क्रममा ‘मलद्वारको सुनले प्रदेश मन्त्री संकटमा’ भन्ने समाचार प्रकाशित भएपछि अत्तालिएकाहरुले निरन्तर ज्यानको धम्की दिने काम गरिरहेका छन् । तर नागरिकता बिक्री र सुन तस्करीलगायतका प्रकरणका समाचार लेखेको अभियोगमा तिमीहरुले दिएको धम्कीले किमार्थ मेरो कलम रोक्न सक्दैनौं । मेरो कलम भाँचौला, कलम समाउने हात भाँचौला, गोली ठोकौला तर तिमीहरुका कुकर्म र अपराधका विरुद्ध सत्य, तथ्य लेख्न छाड्दिनँ । प्रमाणका आधारमा लेख्न पत्रकारिताले सिकाएको यो मेरो आत्मविश्वास हो ।