नक्कली शरणार्थी प्रकरण र तथ्यपरक अनुसन्धान

संगठित अपराधको प्रकृति अन्य अपराधभन्दा फरक हुन्छ । राजनीतिमा अपराधीकरण र अपराधीकरणमा राजनीति शिखरमा पुगेको बराबर घट्ने यस्तै संगठित अपराधको घटनाले पुष्टि गर्दै आएको छ । नियन्त्रित हुनुपर्ने यो अपराध अझ विस्तारित हुँदै सिक्काको दुईपाटाजस्तै भिन्न हुन नसक्ने अवस्थामा पुगेको देखिन्छ । अपराधमा संलग्न नभए वा अपराधीसँग साँठगाँठ र सहकार्य नगरे राजनीतिमा स्थापित हुन नसकिने, प्रभावकारी छवि कायम राख्न नसकिने, सत्तामा पुग्न नपाइने अपराधिक मानसिकता नेतामा विकसित हुँदै आएको छ ।

राष्ट्रिय राजनीति नै अपराध प्रभावित हुँदा त्यसबाट मुलुकलाई पर्ने असर कति घातक हुन्छ भने कुराको कल्पनासम्म गर्न सकिँदैन । यो देशद्रोही अपराध हो । राजनीतिक व्यक्तिको अपराधप्रतिको आशक्तिले अपराधिक कार्यको संरक्षणकै निम्ति व्यक्ति राजनीतिमा आबद्ध हुने गरेको संकेत गर्छ । कतिपय ठूला दलकै शीर्षस्थ नेताले नै अपराधीलाई संरक्षण दिँदा त्यसैको आडमा राजनीतिक अपराध बढ्दै आएको पछिल्लो दृष्टान्त नेकपा एमालेका पार्टी सचिव एवं पूर्व उपप्रधान तथा ऊर्जामन्त्री टोपबहादुर रायमाझी संलग्न भनिएको नक्कली भुटानी शरणार्थी प्रकरणलाई लिन सकिन्छ ।