सुन कारोबारको बहानामा अपहरण, मामा-भान्जा मिलेर हत्या

झापा शिवसताक्षी नगरपालिका–१० का सरोज शर्माको हत्या आरोपमा २ जनालाई प्रहरीले पक्राउ गरेका छ ।

सोही ठाउँका २३ वर्षीय राहुल साह र २७ वर्षीय सुनिल साहलाई प्रहरीले शुक्रबार पक्राउ गरे पनि आइतबार मात्रै सार्वजनिक गरेको हो । पक्राउ परेका साहद्वय मामाभान्जा नाताका हुन् । उनीहरु मृतक शर्माका छिमेकी समेत हुन् । मृतक शर्मा कात्तिक ९ गते साथीलाई भेट्न जाने भनेर घरबाट हिँडेका थिए । घर नआएपछि परिवारले कात्तिक १० गते प्रहरी कहाँ खोजीकार्यका लागि निवेदन दिएका थिए । तर, घरबाट हिँड्को एक सातापछि (शनिबार) पुलमुनि गाडेको अवस्थामा उनको शव प्रहरीले फेला पारेको थियो ।