विपद्‍मा विनाशकाले बुद्धि

२०७२ को विनाशकारी भूकम्प बिर्सन नपाउँदै देशले फेरि ठूलो भूकम्प व्यहोर्नुपरेको छ। भूकम्प गएको पाँच दिन बितिसक्दा पनि सबै भूकम्प पीडितले त्रिपाल र राहत सामग्री पाउन सकेका छैनन्।

जाजरकोट केन्द्रबिन्दु भएर गएको भूकम्पले १ सय ५३ जनाको ज्यानमात्र लगेन, १३ जिल्लाका ३५ हजार परिवारलाई घरबारविहीन बनायो। तर, आफ्ना प्रदेशका समेत नागरिकहरू भूकम्पले त्राहीत्राही भएका बेला लुम्बिनी प्रदेशका मुख्यमन्त्री डिल्लीबहादुर चौधरी विदेश भ्रमणमा व्यस्त छन्। प्रदेश राजधानी भएको जिल्ला दाङसहित रुकुमपूर्व, रोल्पा र प्यूठानमा भूकम्पले घर भत्किएका छन्। सरकारले भत्किएका घर पुनर्निर्माण तथा नागरिकको राहतमा कुनै योजना बनाएको छैन।